AccessNorway - saman for eit meir tilgjengeleg reiseliv

‍Å arbeide for eit meir tilgjengeleg reiseliv er god business for norske reiselivsbedrifter, i tillegg til at det skapar betre lokalsamfunn for alle. Ein av fem vil oppleve ei midlertidig eller permanent funksjonsnedsetting i løpet av livet, og i møte med aldrande befolkning i Noreg og Europa vil dette behovet berre auke. Visste du at gjester med funksjonsnedsettingar bruker opp til 30% meir pengar per reise, og at auka tilgjengelegheit samla vil kunne gi opp mot 630,000 ekstra gjestedøgn i landet?

‍Å koma i gong med tilgjengelegheit kan verka krevjande, der ein gjerne ser føre seg større fysiske utskiftningar og ombygging. Sjølv om dette er ein del av arbeidet med tilgjengelegheit, betyr det ikkje at dette er einaste måte å koma i gong på. Gjennom små, konkrete tiltak over tid vil bedrifter og reisemål over tid kunne utvikle seg til å bli meir tilgjengelege, med utgangspunkt i kva moglegheiter og ressursar kvar enkelt har. Alle kan difor koma i gong med tiltak for å bli meir tilgjengelege, uansett utgangspunkt!

For å gjera det enklare å koma i gong og for at brukaren skal få meir stømlinjeforma informasjon har NDBR, Sunnasstiftelsen og Inklu-Beitostølen inngått eit samarbeid. Her ønskjer ein å ta utgangspunkt i reisemål og reiselivsbedrifter sitt arbeid med å bli meir tilgjengelege, for å skape ein felles nasjonal standard for korleis ein arbeider med og kommuniserer tilgjengelegheit i norsk reiseliv. Prosjektet fekk tilskot av BUFDIR våren 2025, der ein i løpet av året vil lansere ein felles verktøykasse med namn "AccessNorway", som inkluderer:

• Mal for digital tilgjengelegheitsguide på reisemålsnivå, for at reisemåla skal kunne gi lik informasjon på tvers av landet sine "Visit"-sider
• Prosessverktøy for reisemåla, med konkrete og enkle skritt til korleis dei kan jobbe med å bli meir tilgjengeleg
• Prosessverktøy for reiselivsbedriftene, med konkrete og enkle skritt til korleis dei kan jobbe med å bli meir tilgjengeleg
• Felles symbol for produktbeskrivingar i reiselivet, der produktet er beskrive etter ein felles minimumsstandard for tilgjengelegheit
• Kurs for vertskap og bedriftseigarar i NDBR sin kurs- og kompetanseplattform "BerekraftsAkademiet"

Arbeidet vil bli utvikla saman med brukargruppe frå Sunnasstiftelsen, Inklu-prosjektet på Beitostølen (Valdres) og Innovasjon Norge/Visit Norway.

Har du innspel til arbeidet? Me høyrer gjerne frå deg!